上星斯六曼聯喺聯賽悶和紐卡素，英超開季三場只入兩球。雖然攻力疲弱，正箭頭朗尼就連波都冇點射過，但係主帥雲高爾喺賽後記者會仍然死撐球隊表現理想，唔需要買前鋒喎。
不過，有外地傳媒影到巴塞隆拿前鋒尼馬嘅國際經理人薩哈維，上周六出現喺奧脫福嘅觀眾席度睇波，再加埋外地傳媒催谷話之前活華特遠赴西班牙，其實係斟介尼馬而非柏度，講到呢位巴西球星會加盟曼聯似層層咁。不過佢身為巴塞絕對主力，轉會費估計要破世界紀錄嘅1.38億鎊（約16.6億港元），佢經理人列比路仲講明「尼馬在巴塞過得很快樂」，估計都係煲水新聞居多。計埋之前傳過嘅加里夫巴利、基沙文同沙迪奧文尼，曼聯嘅險簽陣容又多一名猛將。轉會市場會喺呢個月31日關閉，雲高爾真係要盡最後努力買人喇！