容天鵬今年趁唞暑搬倉，忙咗一輪已經搞掂晒。爆鵬哥話暑假冇馬跑較悠閒舒適，啲馬較容易適應新環境，對馬房上下都有利。呢日（23號）佢就呼朋結友入倉拜神，祈求新馬季搏殺得心應手。
烈日當空下，應邀出席酬神儀式之馬主有「電子鳳凰」嘅盧榮民、「安打」嘅王忠秣、「嘉應之友」嘅王惠棋，以及同主馬「金鹿」、「觀自在」嘅鄭應炎等，至於騎師就只有潘頓出現，佢帶埋老婆Nicole及乖女Roxy到場，一家三口畀足面主人家，潘頓仲親自切燒豬。
「觀自在」同「金鹿」上季合共三捷，實力強勁，鄭應炎話令佢相當滿意，呢日乘入倉之便，佢親自向兩駒餵食紅蘿蔔，以示獎勵，而潘頓抱Roxy到馬格探「觀自在」外，又帶囡囡去睇「電子鳳凰」，可見呢對馬喺潘頓心目中嘅地位，唔通潘頓想Roxy他日好似個馬名咁，飛上枝頭變鳳凰？