范統讀中學時玩短跑，𠵱家鍾意打拳，一直都唔打golf，可以估到佢偏愛具爆炸力嘅運動，個人亦可能比較性急，估唔到佢家中兩隻愛犬嘅名字亦都偏「辣」，一隻叫Chili（紅辣椒），另一隻叫Pepper（胡椒）。
范統係愛狗之人，一提起愛犬，樣子變得特別溫柔，噚日范太帶埋家中嘅美國秋田Chili與愛斯基摩犬Pepper去拳館接范統食晏，兩隻狗身形龐大，但非常聽話，十分可愛。
雖然范統愛「辣」，但唔等於佢躁底。佢話，喺工作上甚少鬧人，最多只係鬧一啲工作求其、冇心機嘅同事。
遇上忟憎事，佢多數匿埋喺自己房，搵支鉛筆，不停喺紙上面亂畫；再忟啲，就「啪」一聲拗斷支鉛筆，不過一年最多只有一、兩次拗斷筆，佢笑住話「公司啲筆都好貴㗎」。