出街上網怕用爆數據，好多人都選擇搵WiFi，但千祈要小心唔好用不明來歷嘅網絡。手機保安軟件Skycure日前出咗份調查報告，提醒大家注意網絡安全問題，列出10個全球最唔安全旅遊景點WiFi網絡，紐約時代廣場排第1，香港海洋公園榜上有名排第5。
Skycure報告話，紐約、巴黎、三藩市同拉斯維加斯等大城市嘅WiFi風險比較高，而印度泰姬陵網絡就係全球最安全。報告又話，用Android系統嘅網絡風險高過iOS機接近兩倍。
俾人點名咁大件事，八方梗係向海洋公園求證啦，點知園方回覆八方話，公園入面根本冇提供WiFi服務；有遊客則同八方講，喺公園想搵免費網絡share靚相畀親友都冇。七月流流，唔通Skycure嘅手機可以收到啲我哋唔知嘅訊號？