呢個欄主要想講名人與食物之間嘅故事，講到最有意思同感情嘅食物，在呢個世界上，排第一位肯定係媽媽所做嘅菜。醫管局前主席胡定旭嘅花名叫「肥胡」，睇佢身形已經知道佢係「食家」，雖然食盡各式美食，但佢最喜歡都係93歲母親炮製嘅菜脯蛋。
菜脯係醃製過嘅蘿蔔乾，胡定旭係潮州人，佢話，潮州人家中一定有菜脯，方便隨時拎出來做餸或作調味品。佢自小愛食蛋，最喜歡食媽媽炮製嘅菜脯蛋。胡媽媽𠵱家年紀大，好少親自下廚，但已經將下廚秘技傳授予菲傭。
胡定旭相當孝順，每星期都會去跑馬地探望媽媽2至3次，每次去到，胡媽媽一定吩咐菲傭為胡定旭準備菜脯蛋與白粥。胡定旭一臉饞嘴咁話，「菜脯蛋配白粥真係相當美味」。
胡媽媽出品嘅菜脯蛋確係充滿媽媽嘅味道，一食就知道係住家菜。平時喺外面餐館食嘅菜脯蛋，十之八九都係鹹到飛起，胡媽媽嘅出品絕對唔鹹，只有輕微鹹香。胡媽媽嘅做法係先將菜脯切粒炒香，再加入蛋與些少蒜頭粒，煎成蛋餅，筆者都唔客氣，一口氣吃掉了。
記者：高淑嫻
