研發出第五代太陽能電動車SOPHIE V嘅香港專業教育學院（IVE）工程學科學生，10月會去澳洲參加世界太陽能車挑戰賽。隊員近日加緊備戰，喺沙田污水處理廠嘅車道測試，兼練習組裝車身同檢查維修。
今年希望入三甲
挑戰賽兩年一度，上屆香港首度參賽得第四，今次希望可以殺入三甲。同當時出戰嘅SOPHIE IV一座位三輪車比較，SOPHIE V有一個乘客座位兼儲物空間，顯示太陽能車逐步邁向民用。鋪設咗388塊階磚size太陽能板嘅SOPHIE IV時速達110公里，只要充電三粒半鐘，冇日照都可行250公里。
SOPHIE V會同世界各地12支隊伍競爭，由澳洲北部嘅達爾文港出發，橫越澳洲中部到達南部嘅阿德萊德市，3,000公里路程要喺6日內完成，途中只能充電一次。比賽朝8晚5進行，隊員只能喺途經嘅草原同沙漠紮營休息，難怪修讀機械工程學高級文憑嘅林柏森話，同隊員已經定期遠足，鍛煉體能應戰。