新季意甲噚晚揭開序幕，上季屈居祖雲達斯之後得亞軍嘅羅馬，喺出發作客維羅納前就傳出振奮士氣嘅好消息。根據當地傳媒報道，下個月就39歲生日、越老越可愛嘅王子托迪（圖），喺今季展開個人第24個意甲球季前，已經決定同球會續約一年，即係下季將會以40歲高齡繼續為「首都狼」效力，到時亦會追平AC米蘭名宿馬甸尼所保持嘅效力同一間意甲球會最長紀錄（25季）。