特區政府搞政改失敗後，口口聲聲重視民生經濟，少談政治，話民生無小事咁講，於是首先就係配合民建聯議員李慧琼嘅提議，搵政務司司長林鄭月娥掛帥，大搞全城清潔運動，點知還未出師就已經發生屋邨食水含鉛事件，俾泛民議員搶咗先機，陷民建聯、工聯會於被動，本來以為贏梗嘅11月區議會選舉，依家泛民有逆轉勝嘅機會，於是大家都去抽水驗水搵鉛水，全城清潔運動喎，邊有人理會呀。
梁特首不知是否因此而搵新華社訪問，希望轉移視線，大打經濟牌，高唱一帶一路之經濟商機，又話明過往之「積極不干預」政策不合時宜，須要放棄，大講「適度有為地引導和配合企業」。其實梁特在2012競選時，已表示過「積極不干預」唔係佢杯茶，現在講到明，並無新意，我地要注意及之嘅其實係「適度」有為地引導和配合工業。呢啲事情就似係南韓政府「適度有為地引導和配合」大財閥如三星、現代、大宇、LG等等嘅發展，形成財閥壟斷局面，令南韓變成「三星共和國」，仲敢膽以「脫殖70周年」為名，大赦囚犯，包括十幾名商界名人在內，香港叫呢啲係官商勾結。坦白啲講，梁特為配合習大大之一帶一路政策，大講一帶一路商機，唔通中小企有資格「受引導」咩，只有大財閥先至有財力物力人力去哈薩克、中東等地方投資基建及不同工業嘅箒。梁特話到明，現在香港研究一帶一路有三方面內容：（一）從沿線60多個國家選擇優先國家，（二）選合適的產業，（三）特區政府推動工作的具體操作形式。換言之，政府研究人員（不知係甚麼部門，照計政府無此人才配備，唔通要另立新官方智庫？）會為商界篩選，鼓勵廠商投資，仲可能借埋錢俾廠商㖭，否則何以引導？
如此做法，涉及香港政府170年思維嘅大轉變，實在非同小可。在政府服務十年以上嘅官員，恐怕從無干預市場概念，亦無干預工具，要重新受梁特訓練過至得。香港8間大學亦無人才學者研究過一帶一路沿線嘅60個國家，研究人員唔通要在北京上海尋找？諗吓都覺得牙煙。真係要恕怪左丁山孤陋寡聞，香港有邊位名師對一帶一路沿線60國有深入認識，請通知，簡簡單單，連研究鄰近東盟經濟嘅名家都未之見也！梁特話研究房屋、開放土地，佢係測量師，唔敢同佢拗，但放棄積極不干預政策，要引導和配合企業喎，講笑話咩！