20幾年前讀書時代鬥波，戰情緊湊，對方前鋒近門抽射，好在我哋個龍門夠噸位，一抱入懷，順勢瞓咗落地，但就久久不起。「肥Joe，快啲起番身啦，等女同學影相咩！」係，我哋呢位守門員冇速度、唔夠高、跳唔起，焗住要守龍之下，受埋班自認好波嘅同學唔少氣，不過肥Joe勝在幾搏命，左飛右撲屢救險球，所以亦有飛貓嘅外號！
可能俾我哋輕視得多，在學期間，肥Joe不時都會的起心肝話：我要減肥！不過唔知係方法唔啱，定係決心未夠，大專四年間肥Joe身形唔止冇變，仲有每況愈肥嘅趨勢。
如是者就畢咗業，對大部份嘅人嚟講，畢業就係專心搵食嘅時候，個人興趣同健康無謂再嘥時間關心，那些年的苗條身形同敏捷身手，以及球場上那可愛笑面，都只會喺相簿同回憶中搵到。每個人都係咁㗎啦，除咗肥Joe。
時光機一轉去番幾年前嘅彌敦道口，當晚我喺微風中歸家，人疲倦得可怕，迎面而來一個帶住笑容嘅輕快身影，「Hello？Keyman，收工呀？」
「你咪肥……唔係肥，你咪阿Joe！因乜咁fit嘅？」我真係好驚訝咁問！
「冇呀，之前跟朋友去跑步，跑跑吓就上咗癮。」
「咁跑成點呀？」我語氣有少少輕佻，話晒我當年係出名嘅長氣袋。
「最近跑咗個馬拉松，三個鐘過咗少少囉。」
「吓！」我下巴跌咗落地。
「係呀，咁你仲有冇keep住跑呀？」Joe有心咁問。
「唉，追巴士算唔算？」我冇心咁答。
「哈哈，我去練習呀，遲啲再傾吖，加油啦！」
馬拉Joe一個轉身絕塵而去，得番我一個人企喺路口，腦裏面有好多個點解，點解肥Joe會變咗馬拉Joe，點解我會變咗另一個我？為咗搵答案，我𠵱家每個星期跟佢練跑。一路跑一路諗，當年嘅我有幾自大，家陣就有幾自卑。
KEYMAN
節目主持