【本報訊】「阿夢」是劉夢瓊的暱稱，偏偏她以足球為夢，更是備受忽視的女子足球，但她的堅持令夢想成真。她早前獲日本乙組東京足球學校賞識簽約3個月，現時身在當地的她，正磨拳擦掌等待上陣機會，闖出足球夢，她說：「會好好享受食飽瞓、瞓飽練嘅生活。」
記者 金敏琍 攝影 麥超億、張鼎和
25歲的阿夢是香港女子足球聯賽隊公民的主將，司職中場，瞻前顧後，亦是港隊成員。09年起，代表香港出外參賽，包括去年的亞運會。同是足球員，但偏偏男女有別，本地男子足球員是職業的，不單每月有固定收入，勝出比賽更有獎金，若然時來運到更可登上頭條。那女足球員呢？贏出聯賽冠軍的獎勵，原來也只是一頓自助餐「「喺香港踢波，女仔出路其實係零，我哋唔係受薪，全部都係靠興趣，用課餘同工餘時間去練波。」
過去零報道，今次成功簽約日本球隊，旋即成為鎂光燈下的主角，阿夢坦然不習慣，「報道女足係好事，我哋係主角就唔係好事，因為唔習慣，從來都唔會咁多人去做訪問」。但對阿夢家人來說，女兒登上各大體育新聞版，是件光宗耀祖的事。上月日本試腳回港當日，夢爸除了斬料加餸外，更會搜集女兒剪報存檔，「有街坊問阿爸，『呢個係咪你個女？』，佢哋嗰輩可能會開心啲，對於我來說依然係正常人一個」。看見老爸開心，阿夢亦感安慰。
其實阿夢的足球夢，夢爸亦有功勞，更是9歲時已在佛山開始。夢爸見女兒愛波如命，便帶她報讀市內體育學校，爸爸也是足球員，對女兒遺傳踢波天份，他自然舉腳支持。惟夢媽始終擔心女兒家變男仔頭，「佢(媽媽)會覺得唔好曬到咁黑，唔好再踢波，成個野人咁，粗粗魯魯，但我無理，繼續踢波」。
阿夢剛畢業於城大活動項目管理副學士，目前在車路士足球訓練學校當兼職助教，為的就是有更充足時間踢波比賽，「做教練可以根據自己時間去調整，時間會鬆動啲，可以踢波踢得多啲，我大部份時間都喺球場出現，除咗食同交通，都唔會特別用得太多錢」。
踢中場的阿夢，有沒有至愛球星？她展示左手中指的阿拉伯數字「8」紋身，後生女當然非貪好意頭取諧音「發」，說到底，都是與足球相關，「呢個號碼跟咗我好多年，陪我輸波、贏波、受傷，所有開心唔開心時間都係著住呢個號碼，所以就將呢個號碼放喺自己手上」。更重要的是，她最愛的球星卡卡正是穿着8號球衣，對這位前AC米蘭球星，她的評語是球技好，更重要是「好靚仔」。球場巾幗，也流露出罕有少女的一面。
年輕人熱血，築夢零成本，人越長，面對工作事業婚姻家庭，慢慢就會向現實低頭，阿夢坦言見證過球圈師姐因為種種而放下足球，她會給自己4年時間，去盡情發「夢」，「我知波係踢唔完，喺自己有限同有能力去做好呢件事時，就會盡全力做好，但當時間一到，就要放低去做正經嘢」。
踢波即是同陽光玩遊戲，注定與白滑美肌無緣，阿夢皮膚黝黑粗糙，加上一頭短髮，問她要在拍拖定踢波中選，她說肯定是後者，「大咗之後，發覺識嗰啲男仔都覺得長髮女仔、化妝女仔係最好，我明白男仔諗法，就會覺得無所謂啦，我唔係化妝呢類型，做朋友都無問題，唔會夾硬為咗呢樣嘢而去改變自己，咪做朋友囉」。