【本報訊】足球是熱血運動，汗水與淚水、甚至血水交融，3位香港女子足球員陳詠詩、劉夢瓊、張煒琪，憑無比鬥志和拚勁，獲日本乙組球隊日本女子足球學校賞識簽約3個月，星期二早上她們已經出發去日本，向球會報到投入訓練，爭取上陣機會。
記者：金敏琍、潘婉玲 攝影：周子惇
夏天是球季歇暑期，但3位足球女將風塵僕僕，上月赴日試腳。3人同是香港女子代表隊隊友，經常出外作賽。31歲的港隊隊長陳詠詩是大師姐，對出外作賽抱有期望，「最想去見識，睇吓人哋係點」。25歲的中場「阿夢」劉夢瓊，踢爆道：「邊個最緊張？梗係煒琪啦！」跟阿夢同齡的張煒琪亦是公民隊隊友，原本臉容緊繃的她笑言：「我次次比賽前都係咁……好緊張！有乜一定要帶？梗係波boot啦，哈哈！」其實3人各司其職，阿夢是進攻中場，詠詩踢防中，高妹煒琪是前鋒，彼此早有默契。
登陸日本，最希望正選上陣，3人中大師姐的陳詠詩是足球痴，球場就是舞台。「女仔踢得波要真係好鍾意足球，先至會選擇留喺度。唔同男仔，男仔可能為錢而踢。」
雖是本港女足領軍人物，踢波逾廿年，代表香港征戰無數，但記者用她的名字上網搜尋，卻只有3頁資料。她淡泊名利，只關心有沒有場地，「我哋都唔使要咩資助，純粹要場地，香港而家嘅場地好難租，一星期只能練習一次」。
9歲跟胞兄在屋村走廊踢波，由走廊到街場，由街場到青訓，再踢聯賽及港隊，胞兄早已半途而廢，反而詠詩越踢越起勁。「試過喺巴林踢完第1場，第2場開波唔夠兩三分鐘就受傷韌帶撕裂，返來照X光差唔多斷，之後照去踢5人室內比賽。」
31歲的她從來對自己很有信心，「我係打防守中場，既要進攻又要防守，以我呢個年齡，體能ok。」事實上，日本女足靈魂人物－－35歲的澤穗希正是詠詩偶像，夢想不分年齡，只在乎堅持。
至於高妹張煒琪是球隊神射手，去季攻入31球，球場上英姿颯颯。脫下球衣，正職是在廚房沖奶茶、煎腸仔蛋，「又熱啦，又要早起身，不過無辦法啦，要兼顧我摰愛」，她的摯愛，正是足球。
「一個人如果無夢想，同條咸魚有乜分別？」這句電影對白老到掉牙，但煒琪母親為了不想女兒變咸魚，鼓勵她去追夢，「阿爸做運輸，唔係成日有好多工開，阿媽做飲食業，阿哥做跟車」，做餐廳水吧的煒琪是家中經濟支柱之一。今次可以到日本踢波，難得媽媽全力支持。「阿媽話唔好考慮喇，香港所有嘢交番畀佢哋啦，『女，你去啦』，因為媽咪知道如果我擔心佢，就會放棄呢個機會。」