早前小妺接受了一個訪問，同行者還有來自四面八方的女性，比較熟悉的有林二汶和吳日言，一班女人柴娃娃的說成功之道，小妹自問不太成功，但總算靠玩，玩出一個天地來，成功不成功不緊要，最緊要工作過程非常好玩，那就夠了！各人都在討論一個女人如何變得完美，我就認為世上沒有完美的人，只要接受了自己的缺點，甚至懂得欣賞自己的缺點，那就算是完美了。
「杜如風嘅缺點好多嗰喎」
怎料，訪問中原來有一個神秘的環節，就是母親對我的看法，原來主辦單位事前找了我們的媽媽，問了幾條關於我們的問題，然後在現場播放給我們聽，真是surprise！各人的母親都是說一些鼓勵女兒的說話，聽得感人，令人感恩！設計師Lillian Kan的媽媽還寫了一封情信給女兒，大致上是說叫她不要太搏命工作，收到手寫信當然特別快樂！各人都得到很高的評價……輪到小妹了，我一早知道家母不會放過我；第一條問題：「對女兒的觀感，她最大的優點和缺點是甚麼？」家母回覆：「杜如風嘅缺點好多嗰喎，冇乜時間觀念嘅，成日遲到，但係佢嘅解釋呢，就話佢班朋友個個都係咁遲法㗎啦，所以唔需要特別準時啦！第二呢，就係佢唔會打理家務嘅，就算屋企堆埋一大堆嘢，佢都唔會去執拾嘅！第三呢，眾所周知㗎啦，就係佢非常鍾意買嘢，乜嘢都買到一餐嘅！至於優點呢，佢有啲小聰明啦、反應快啦，同埋呢，佢真係天跌落嚟當被蓋，係好樂觀好樂觀，但呢個亦都係佢嘅缺點嚟嘅，因為佢太樂觀冇乜警惕心，例如佢收咗幾次騙案電話，好彩佢最後都冇俾人呃到錢！」
「佢真係非常之我行我素」
第二條問題：「你認為你女兒會不會介意別人對她的看法？會不會刻意掩飾自己的缺點？如有她通常會用甚麼方法？」母親續說：「佢有冇介意人哋點睇佢呢，呢一樣嘢佢真係完全唔介意㗎，佢真係非常之我行我素嘅，咁但係有陣時我都會提醒吓，太過自我中心呢，就好難免會有偏見嘅，暫時好似冇乜出亂子啦，但係當然希望佢以後都會謹慎啲啦。」
最後一條問題：「作為母親，一直以來都想跟她說的話是……」「希望佢早啲搵到一個好包容佢嘅，無論佢有幾多缺點都好包容佢，同埋呢，真係搵到一個盡佢餘生嘅力量、時間，去愛護佢嘅人啦！」嘩，咁嘅人去邊度搵呀媽咪？
訪問後我立即致電媽媽：「嘩，媽咪，你答嗰啲問題，條條都背脊骨落，人哋啲媽咪答嗰啲答案全部都係鼓勵、疼錫、再鼓勵，你就明明講緊優點都可以變咗做缺點，結果我得到嘅全部都係缺點，我捱得咁辛苦，讚吓都得啩？」「我就係唔想一面倒咁讚你，聽起上嚟會好悶㗎嘛，𠵱家咁答咪幾特別囉！」唉！沒辦法，媽咪以前是老師，執法甚嚴，尤其是對待她的女兒，要求自然更高了！我惟有繼續努力啦！
風人院
撰文：杜如風
旅遊節目：《流行東京1,2》阿四，《風行全世界1-5》幕後黑手，《流行首爾》 眾矢之的。著作：《風行系列1-7》
本欄逢周日刊登
