葵青區議會搞咗個「攜青」fb專頁，結果好多人話「廢」，「攜青」變「廢青」，引發連串風波。
第一，宣傳長者用fb？葵青區議會希望「加強社區健康服務，包括為長者提供驗牙、驗眼服務」。
目標觀眾是長者，但宣傳渠道居然是fb？你有無問過區內長者，有幾多個會上網玩fb？
63萬公帑夠區內長者飲好多餐茶換好多副假牙啦！
專頁回應說，長者不上網，但長者的家人會上網，所以其實網頁的目標觀眾是年青人，讓他們看完資訊，轉達給家中長者。
根據這個邏輯，即係你可以落蘭桂坊嘅club度，推廣長者假牙服務，然後同人講：啲𡃁仔𡃁妹蒲完返屋企就會同老豆老母分享呢個假牙資訊，你話係咪好直接同有效呢？Yeah！
第二，個page同主旨完全無關係！專頁相片全部老香港或者葵青舊貌，請問這些求其網上copy的老相片，和官方所聲稱的「葵青區議會在今年三月決定撥款進行facebook宣傳，希望健康生活的訊息更能傳播至社區的不同階層」有甚麼關係？
看到懷舊雪糕車，讓長者想起自己幾十歲人為咗身體健康唔好食生冷嘢嗎？
專頁回應說，先用懷舊人文感情吸引網友，再慢慢滲透健康資訊，並強調這是一年的推廣計劃。明白，唔講懷舊嘢，單講健康資訊，點捱足一年使你63萬元啊傻仔？
第三，買like疑雲﹗
專頁堅持自己無買like，問題是，一個講地區page何以會有台灣甚至印尼朋友like？
你問問自己，會不會無端端like台灣淡水區公所的page呢？
更何況，有好些俾like的外國網友，連中文都唔識！
他們是如何找到這個page並且能夠克服語言障礙，對這些「copy圖片+看不懂的中文字」，給一個真心的讚呢？
還我63萬公帑！