政府搵榮總梁家榮做廣播處長睇住港台，港台員工上下都算畀足面佢，冇好似對上手鄧忍光咁，未返工已開拖。榮總返咗兩個星期工，同港台員工又合作成點？佢大讚港台員工有想法、有理想，又話副廣播處長戴健文同自己好老友，仲話自己都支持廣播處長應由內部提升，真係識擦港台上下鞋！
兩次應徵廣播處長
話說榮總噚日同行家茶敍，大讚港台同事好掂，有想法又有理想，又話港台節目有多角度，「其他媒體都攞唔到呢啲角度做」，睇完同事講解做咗乜嘢節目後覺得好感觸同感動，大讚「港台真係做得好，係港台先敢搞呢啲嘢出嚟」。佢以港台電視部入到靖國神社拍攝做例子，話自己做咁耐新聞，都未聽過香港嘅電視台可以入到去。
除咗讚員工，榮總又不忘冧高層，佢話獵頭公司當日接觸佢，佢已經反映港台台長（即係廣播處長）應由內部提升，「否則（外人做）好辛苦，認東南西北都認死」，強調自己至今仍然百分百希望港台內部晉升台長，更自揭同戴健文係好朋友，形容對方係香港電台字典，等戴健文休假結束後要向佢取經喎。
不過講開呢份工，佢話其實獵頭公司已連續三次搵佢應徵，第一次落選政府就搵咗黃華麒；第二次佢自己推咗，因為當時喺亞視，覺得窮得好快樂唔想走。榮總今次應徵已係第二次，原本只係抱住試吓冇所謂心態，冇諗過自己做到；佢又話任內最大希望係港台盡快起到新大樓，因為越遲起成本越高。
李八方
mailto:[email protected]