美國街頭水上樂園「Slide the City」由今日開始至24號，於啟德郵輪碼頭舉行，鋪出千呎大型滑水道，並增設10米高台，斜台部份佔整條滑水梯嘅3/4，令參加者「瀡」得更快。大會贊助商I.T昨晚就安排員工率先試玩，仲可以帶埋員工家屬去玩，好似昨日先去完黃大仙還神嘅DaDa Lo盧頌之，就同一個高大型男去咗玩。
昨晚8點半左右，兩人抵達場地，開始瀡呀瀡，去到邊都形影不離，就連瀡滑梯都係孖公仔咁玩。期間兩人冇乜親熱舉動，但就好sweet，DaDa亦玩得好開心，不斷自拍、互拍，仲幫襯埋現場嘅即影早即有，影影影，渾忘煩惱。
瀡完一輪，消耗體力，兩人一齊搵嘢食，玩咗45分鐘左右，兩人走喇，各自換衫。高大男一早換完，好有風度咁喺洗手間外等DaDa，期間仲撞到朋友，高大男特地行開少少，唔阻住DaDa同朋友傾偈，之後兩人雙雙搭的士走lu。
而DaDa接受記者訪問嘅時候，就話呢個高大男係佢嘅化妝師朋友，仲話之後都會同佢有好多合作。DaDa又講到今次好好玩，比起上次試玩嘅時候好玩，又話因為自己嘅體重可能瀡唔到，所以要工作人員幫手，仲話好驚險。