民主黨呢幾年搵咗好多後生仔落區做地區工作，有啲已經係區議員，有啲仍然係社區主任。白鴿黨噚日開個記者會，介紹一本叫《區政新角度》文集，記錄佢哋嘅地區事務工作，當中包括唔少年輕成員，例如年僅22歲嘅社區主任馮文韜，喺書中分享對劏房戶問題嘅工作同見解。
白鴿黨主席劉慧卿噚日同呢班乳鴿一齊開記者會介紹本書。八方打聽到呢本書仲有一個幕後功臣，就係張文光，佢一直好鼓勵呢班乳鴿將自己地區工作經歷出書，仲同一名年輕黨友鄒旻芳一齊做本書嘅編輯。
正身在蘇格蘭高地嘅張文光同八方講，希望更多人透過呢本書認識民主黨年輕人嘅工作。