曾經，被視為「一台獨大」、壟斷整個香港電視製作及廣播，並擁有「慣性收視」的TVB（511），都可以將優勢斷送。
TVB中期業績「肉酸」，收入跌11%至20.3億元，其中香港電視收入由去年同期的15.8億元，跌12%至13.9億元，而近期大搞的GoTV及myTV等數碼新媒體業務，收入更由8757萬元，減少17.5%至7228萬元，都反映TVB上半年廣告收入大跌。
公司話係零售市道不景，「奶媽」奶粉商廣告急跌。不過明眼人都知，就係節目無人睇！仔細留意過去幾年TVB王牌劇集收視點變化，由2013年《老表，你好嘢！》34.6點，跌到今年上半年外購劇《武則天》，只有27.2點收視，以每點6.5萬人計算，短短三年間，就少48萬人收視。
啲人去咗邊？好大可能轉移陣地，在youtube、千尋、風行、愛奇藝繼續煲劇。理論上myTV都有一班觀眾，可惜的是，TVB應對收視及廣告收入減少，就係買更多外購劇播，減少本地大額製作，節省成本之餘，又有得「播住先」。不過TVB由劇集賣埠變買劇播，除咗令公司減少發行收入，今年上半年節目發行及分銷溢利，由3.11億元減少至2.23億元外，最大問題係根本留不住觀眾。
《武則天》同2013年底熱播韓劇《來自星星的你》一樣，一播出街，第二日就網上同機頂盒就可以睇得到。之但係TVB要傾版權，加配音字幕，修改片長留位播廣告等等，往往要半年之後先出到街。觀眾一早睇晒，唔會「坐定定喺度」追舊劇，更加唔會三更半夜等劇集上載到myTV先睇。如果我係廣告商，我知觀眾一早就用千尋、風行睇晒《武則天》同其他外購劇，又點會電視myTV落廣告？而今次TVB計算《武則天》綜合收視點，亦是首次沒有披露網上收視人數。
TVB提高外購劇比例，原意是用慣性收視慳成本，可以賺多啲，但結果賠了夫人（觀眾）又折兵（廣告收入），所以業績一出，第二日開市即刻被掟貨。由周三收市的37.55元，直插到今日收市的30.75元，兩日無咗18%。
事實上，TVB應該要重新出發，加強本土化製作吸引觀眾。但過去幾年，政府一次次在電視業上「適度有為」：否決港視（1137）王維基申請免費電視台牌照，奇妙電視及香港電視娛樂最快出年先開台，亞視拖到最後一刻「釘牌」，模擬制式廣播頻譜延長至2020年才交還予通訊局。結果TVB繼續一台獨大，轉身慢，結果被互聯網時代擊沉。又一次顯示，沒有競爭，哪有進步？
記者：胡仲邦