天時暑熱想落水玩，又嫌泳池同沙灘齋得滯？源自美國嘅街頭水上嘉年華Slide the City今年瀡到嚟香港，今日起一連3日喺啟德郵輪碼頭嘅停泊區舉行，特色滑水梯高約10米、長305米，據講仲係世界各地最長嘅一條，八方噚日去到見到攤位已經搭好晒。
想親身瀡一瀡，記得預先買飛入場，每張盛惠150至480蚊，其中日間無限次體驗票噚晚經已賣完。由於大會規定要有水泡先可以落場玩，如果係買最平150蚊門票嘅你，就記得帶埋個私伙水泡去。
唔想淨係玩嘅，仲可以選擇扮鬼扮馬參加最佳服裝比賽，又或者影低自己瀡緊嘅照相或影片，隨時贏走價值過千蚊嘅大獎。詳情可參考 http://www.stcevent.hk/ 。