電影諧星有好多種，不過唔係個個都可以像Ben Stiller華麗轉型。看到Adam Sandler仍在無聊笑片講爛gag，額頭鑿住「停滯」兩個字就明。在新片《屈機起“格”命》，疲態，他無限放送。是留在熟悉世界，自覺出三分力就能演好，還是真的洩氣？那份無厘神氣，係會傳染觀眾。
電影玩轉「食鬼」、「太空侵略者」、「俄羅斯方塊」等經典起格game，講外星人利用這些遊戲把地球變成一粒粒的像素，最終機迷成了救世主。對於呢條咁鮮明咁出眾的「橋」，我拍爛手掌。在預告片看到食鬼極速碌來碌去，四處破壞，連發明它的「阿爸」都唔放過，我的確笑到咔咔聲。看罷才發現最有睇頭的情節都在預告片。電影改編自法國一條短片，可惜觀影時有一半時間都要捱，點解電影公司不讓它安份做返條短片？
開首回顧小時候的Adam Sandler與其他細路如何迷上打機及參加世界比賽，看到各式「街機」，的確懷舊，機迷心心眼，呢點冇得輸。可惜整段拖拖拉拉，口水多過茶。頭開得唔靚，好難叫人專注下去，結果我專注食爆谷。終於捱完，見到Adam Sandler變成影音產品安裝員，兒時死黨Kevin James做了總統，反差幾有趣，惡搞總統gag也有笑點，可惜對白不夠精警。（Again, Kevin James又係冇乜神采。）加插Adam Sandler與女主角鬥氣的情節都夾硬到暈。當遊戲主角來襲，眾人上戰場，我終於能放下爆谷欣賞。8-bit低清變3D，視覺效果有睇頭，也算看得爽。歡樂時光過得特別快是常識吧，等下一場惡鬥食鬼前，無謂的blah blah blah又再現。另一主角Josh Gad的喜感算幫到手解悶，也讓觀眾終於搵到個比較投入的演員。
大戰食鬼一幕完得突兀，明明人家好強悍，埋佢單嗰招會否太！簡！單！好，當你為最尾打大佬嘅高潮鋪墊，但高潮前的低潮實在太低，那場（自以為）拯救地球嘅慶功舞會令我食咗一噸爆谷，逼Josh Gad唱歌跳騎呢舞係乜事？笑？冷笑就有。悶完高潮大戰零舍高，之前埋下的伏線有驚喜。孖寶兄弟都走出來破壞，真心like。但大戰後再次用口水浸觀眾，媽，救命呀！
《屈機起“格”命》（Pixels）
導演：基斯哥倫布
演員：阿當桑迪拿、奇雲占士、米雪蒙萊根
現已上映
評分：69分
Profile：葉青霞
對電影國籍、題材、風格不挑，偏好活地阿倫的喋喋不休與艾慕杜華式發姣發癲。笑點頗高，耐性稍欠。嘴賤舌毒。視戲院說話的人為敵。
編輯：李寶筠
美術：黃創泰