香港足球代表隊喺世界盃亞洲區外圍賽主場連勝不丹同馬爾代夫，下個月3號會到深圳作客中國。
場波撞正今年「五一九」（1985年5月19日世盃外圍賽擊敗中國）30周年，加埋之前中國足協「有層次」海報事件而受關注。
國際足協疑益中國
八方聽聞中國足協收到香港過百間傳媒申請採訪，《蘋果》當然都有入紙，結果中國足協話申請數量太多，早前要求各傳媒先減少申請名額，最後香港得番70幾個採訪證，噚晚陸續通知傳媒；跟足程序申請嘅《蘋果》收唔到通知，即係冇份啦！至於《蘋果》係因為傳媒太多，定因為其他原因冇份北上採訪中港大戰，八方唔敢亂估，只知主流媒體幾乎全部有證囉。
講開中國隊，本來下月8日會作客馬爾代夫，點知馬爾代夫因為個場太爛唔適合比賽，但又唔改喺中立場踢，竟然同意搬去瀋陽作賽，變咗明益中國多咗場主場。港隊教練金判坤同埋唔少網民都炮轟話唔公平，隊長陳偉豪仲話，馬爾代夫上場主場0：1僅輸畀卡塔爾，今次中國唔使作客，失分嘅機會低咗好多囉，但國際足協同意將場波咁改就冇計，至於公唔公平，就叫球迷自己判斷。