神隱14年的娃娃舜（黃宏舜）早前再度蒲頭，與雨僑合作表演，獲得不錯的評價，成一時熱話。前晚娃娃舜出席在灣仔會展舉行的《猛龍特囧》首映禮，雖然他冇份演出，但都專程捧場。同場還有雨僑、鄭中基，以及曾與盛品儒在街頭纏綿的郭奕芯（Ashina）性感現身。
娃娃舜透露從朋友口中得知，江華的20歲女兒陳薔天（天天）準備闖樂壇，娃娃舜曾在YouTube聽過對方唱歌，問覺得天天唱得怎樣？他說：「OK，不過我冇資格評論佢，我唔係呢方面，我係行外人。」問星二代發展有沒有優勢？他答得避忌：「我唔知點講，但好聽。」問如果天天和他比較，誰唱得較好聽？他說：「唔係我覺得。」
早年娃娃舜曾被江華語重心長的評論「你知唔知你問題係乜嘢？就係太有自信！」昨日問到娃娃舜覺得天天唱得有冇自信？他說：「佢夠。」兩人誰較有信心？他說：「差唔多啦！」再問會否希望與天天同台切磋時，他就表示：「有機會吖。」
約粉絲BBQ
娃娃舜雖然聽過天天唱歌，但反而沒有聽過江華唱歌，問娃娃舜何時會再出山過歌癮？他說：「平時喺屋企有玩，同埋唱K，最近冇乜唱，因為返工好辛苦，做一啲體力勞動嘢。」人氣急升的娃娃舜日前在facebook透露搞fans club活動，於明天在元朗BBQ，每位收費$110，有得食有得玩，還有兩張《猛》戲飛送，見到不少粉絲都按like表示想參加。同場的鄭中基則透露明年暑假開騷，他說：「預算開三場，對上一次開騷06年，當時話希望下次開騷唔使等十年，點知真係要等十年。」
採訪：張俊銘
攝影：陳慧安
