這天沙田泥地有兩組試閘，由於韋達冇到場仍未復課，結果造就41歲現役最老華將賴維銘起孖，包辦兩組頭馬。
先講第一組1200米泥閘，文家良馬房的「智高星」賴維銘胯下留前試後，沿途守第五位，臨尾輕騎交出良好反應，以短頭位擊敗「珍珠旺」勝出，季軍是「有鬥志」。
至於第二組1050米泥閘，苗禮德馬房的「快樂聯盟」原本配韋達，但韋達冇出現，賴維銘頂上操刀，結果此駒出閘敏捷，貼欄帶放有前有後，力挫廐侶「龍城福將」掄元，高達105分的頂班馬「好健康」就跑第三。
講番第一組的「智高星」，曾經喺二班1400米入Ｑ，嗰場只輸給「得盛」而跑贏後來做咗馬王的黑衣巨人「步步友」，係少數贏過「步步友」的馬，可見「智高星」底質甚佳。家陣「智高星」跌到得四班52分，一旦真正回勇，贏兩三場都唔出奇。