近年興起的韓風，為男性形像帶來窩心暖意，「暖男」一詞大行其道，周柏豪正是包含靚仔與暖男於一身的表表者，尤其他近日拍攝的衞生巾廣告，體貼女性的形象表露無遺。近日狂操六嚿腹肌的柏豪，甚至有意挑戰粗獷男行列，加上他在《沒女神探》的乸乸地的角色，真不得不套用《孤男寡女》華Dee名句：「啲女俾你媾晒啦！」
撰文：張俊銘
周柏豪名字一出，大量女性即時雙眼發光，即使近日他在新片《沒女神探》中以乸乸地形象示人，仍難掩蓋他暖男身份，他日前宣傳電影時接受訪問，就透露當初接拍衞生巾廣告也不是沒有經過計算，他說：「分析過之後覺得幾有趣，過往外地都有一啲男藝人去做女性用品宣傳同代言，認為自己可以試吓，我預計過出嚟嘅效果會點，一定會引起話題。」柏豪更謂自己不怕尷尬，豪言「女性用品男仔唔係唔掂得」，他更發表溫馨宣言：「身邊女性如果有需要，男仔係會幫個忙去買。」
效法爸爸買M巾
柏豪的貼心舉動，原來是來自媽媽與他的分享，柏豪說媽媽曾在不方便的日子腰痠背痛，身體未能走動，結果柏豪爸主動到超市幫忙買衞生巾，柏豪說：「我覺得自己所做嘅冇大不了，唔覺有乜尷尬，反而廣告有迴響，又帶畀人歡樂，自己做到稱職代言人已經足夠。」對於接拍廣告前，有否找朋友試用衞生巾，柏豪說：「事後就有，我唔熟嘛，邊個牌子好邊個牌子唔好，問咗同事都話係大牌子嚟。」柏豪的廣告成功，是預計之內，雖然沒機會用到產品，但以男朋友呵護女仔的溫柔及體貼來表達，形象正面所以接拍。柏豪指若再有女性用品邀請，只要沒牴觸現有代言，他也會考慮接拍。
對於一個成功的廣告，柏豪覺得沒有分廣告幫到藝人，還是藝人幫到廣告，他說：「𠵱家網上世界太過發達，唔使我哋兩方面去幫，網民、傳媒都幫到件事發展，最後受惠都係個品牌或我，觀眾層受落已經OK。」但柏豪也不是來者不拒，他說：「有啲廣告喺我自己價值觀唔啱，我就唔會拍。」
曾江廣告最經典
曾江近日遭謝賢掌摑事件變成全城話題，原來曾江的美源髮采廣告在柏豪心中，已為神級廣告之一，柏豪說：「最近可能個品牌覺得舊得滯，將曾江前輩key出嚟，然後後面兩個女仔換咗新潮啲，但顏色服裝調番舊，呢個廣告好入我腦，以前啲廣告好簡單，一個代言人企喺度一句說話，其實已經係幾十年都可以記得。」
髮型：Cliff Chan of Hair Corner
化妝：Gigi Liu
場地：Hullett House