早排葵青區議會搞嘅facebook專頁「攜青」，俾民主黨葵青區議員林立志質疑，專頁超過四成嘅like來自台灣等海外地區，懷疑專頁服務供應商有買like之嫌。林立志前日收到民政處回覆，指服務供應商表明冇買like，不過民政處公開嘅服務合約原來有條文寫明，如果攜青專頁一年內like數唔到3萬，政府有權唔畀錢，咁會唔會有人私下買like呢？讀者自己諗諗。攜青服務供應商亦喺專頁發文回應公眾嘅質疑，至於點解有咁多台灣人like？供應商話佢哋推廣策略冇限制地區，係「台灣人的活躍與受落程度亦超乎了我們的預期」喎！點解喺fb開個專頁都要成63萬？佢哋話呢筆錢包括一年推廣同服務費用，3萬蚊為備選服務，收費絕對合理喎。