人大常委范徐麗泰一早講咗做埋今屆人大就退休唔選，八方估唔到原來佢個馬會大董位都夠鐘要退任，據馬圈消息，接范太個位嘅係圈中猛人楊紹信（圖），佢唔只喺會計界好出名，佢養嘅幾隻馬都好掂。
馬會出咗通告，9月1日周二傍晚會係跑馬地山光道會所舉行一年一度周年大會，預計現任主席葉錫安可順利連任外，副主席周永健應該都冇人挑戰，唯獨通告提到9月將屆70歲嘅范太，將按馬會慣例卸下大董一職，話晒范太係立法會前主席同人大常委，仲係馬會史上首位女大董，佢退落嚟啲會員點都關心。
咁邊個接范太個位呢？據可靠消息透露，好大機會係「好好計」嘅馬主楊紹信。楊紹信係會計界猛人，除咗係羅兵咸永道會計師事務所大中華區前主席，佢仲養過好多馬，現役「好好計」同「好好分」，退役就有「喜得法」、「好好境」同「好好彩」。其中「好好計」相當威水，上年先後揚威杜拜同美國，先喺3月勝出杜拜三級賽北風錦標，到10月喺美國贏出一級賽聖雅尼塔短途錦標賽，成為首匹喺美國贏出嘅香港馬。唔知係咪馬仔叻叻，提高埋楊紹信爭大董嘅呼聲呢？