自由黨主席鍾國斌未開飯先開拖，先喺電台話個人唔支持特首梁振英連任，到噚日自由黨立法會議員去禮賓府同梁振英食飯，自由黨都算畀面喇，除咗張宇人唔喺香港缺席之外，其他議員都到齊，仲話絕對冇同CY嗌大交！
呢餐飯食咗近兩粒鐘，方剛形容飯局氣氛非常和諧，又話大家講得最多係零售業進入寒冬，擔心出現倒閉潮，自由黨希望中央開多6個省市自由行，但CY聽完冇乜回應，似乎唔太贊成。鍾國斌同八方講，席上冇談及CY連任問題，至於一向同CY唔啱傾嘅田少，就話因喉嚨不適，冇講嘢就離開，但方剛話田少同CY席上好好傾，主要講房屋同金融問題喎。