香港巴士車尾，十居其九貼有周大福（1929）廣告，相信好多人都見過。近日，呢批流動廣告開始換新裝，唔再係紅噹噹嘅logo，而係好多句廣東話口號。公司話，此舉係要配合「做多啲香港人生意」嘅經營策略喎。
周大福董事總經理黃紹基早前接受《華爾街日報》訪問，話香港人生意相對穩定，今年調整策略，做多啲本地生意，應對內地旅客消費轉弱。話口未完，近日好多巴士已經貼上周大福全新廣告，寫上「唔試又點知佢咁好」、「信自己，去到哪都很閃」等潮語口號，分明想打動香港人。
周大福發言人同華華講，呢批巴士廣告會一直換，但數量太多，唔知幾時先換得晒。
除咗廣告，公司近期又喺商場搞活動，力谷內地好紅、但香港冇乜人識嘅自家品牌「福星寶寶」生意。