特首梁振英較早前接受新華社訪問時提出，香港應該放棄過時嘅積極不干預思維，要適度有為配合企業發展，特首講到咁，財爺係咪應該有啲表示呢？咁啱噚日財爺曾俊華出席一個電台活動，一班傳媒等住佢講番幾句，點知佢只係笑笑口拋低一句「無興趣（講）」，咁就揚長而去。
財爺噚日出席呢個活動都算係來去匆匆，佢下午5點20分到場，嗱嗱聲參觀一轉電台辦公室，等到5點50點活動儀式正式開始，祝酒、影相十分鐘，佢就快趣鬆人，傳媒想捉都捉唔住佢。
現場有位公關大員都好幫忙，上前問財爺有冇興趣講講對積極不干預嘅睇法，誰不知財爺真夠坦白，笑住話「無興趣」就拜拜了。咁都啱嘅，財爺早排獲國家主席習近平金手一握已經令人無限聯想，聰明人都係少說話，多做事仲好喇。