卓韻芝家有86歲外婆，住在港島的兩婆孫最愛乘電車代步，阿芝指電車是她生活一部份。繼前日在facebook貼文撐保留電車，她昨早更身體力行，由上環西港城電車總站「叮」到鰂魚涌，全程一小時。阿芝不嫌慢速，還非常享受當中悠閒，即使出發遇上下雨，阿芝都不介意狼狽：「坐電車有生風吹吓好舒服，第一次喺電車上做訪問，好爽！唔趕時間我會揀坐電車，車程時間畀自己靜吓，正係一呼一吸嘅節奏。」
對於薛國強的言論，阿芝不屑：「好想知佢以前在任做過邊度城規，佢咁瘋言瘋語係咪想呃like？係咪想頴freelance？佢到底幾耐冇坐過電車？佢嗰句說話好自私，有好多人唔可以行，身體唔可上落樓梯，世界唔係得佢一個人步速，係咪冇咗電車就唔塞車？我好懷疑佢（薛國強）番說話背後有玄機，越講越唔明。」
難忘陪外婆買餸
阿芝斥薛國強不能代表市民心聲，她說：「好多老人家唔認得路，全憑電車一條線咁行，唔似巴士轉到九曲十三彎，周日好多外籍家傭都坐電車，亦唔可剝削佢哋享用權利。」阿芝更呼籲市民一齊發聲支持。
問到阿芝在電車上深刻印記，她說：「同婆婆坐電車去鵝頸橋街市買餸，成日好多人會『搭嗲』，半程車都傾到偈。」
