才女梁芷珊後生嗰陣拍過劇集《他來自江湖》，做黃秋生女友，家陣就係羅傑承太太、足總董事、商人、保良局總理、馬主，咁多身份自然多應酬，但梁芷珊話約朋友飯局，自己卻唔畀對方食嘢，點解咁霸道呀？原來嗰個朋友就係騎師潘頓。
梁芷珊解釋說：「馬主與騎師相約出來離不開飲飲食食，偏偏潘頓很易增磅，而且又很愛吃。我們擔心他食完減磅辛苦，所以不准他吃，有時也會作弄他，以食物引誘他。」
除咗飯局，梁芷珊亦會約潘頓出來遊船河，但原來亦係為咗潘頓體重着想。梁芷珊解釋說：「上月我想約潘頓及其太太Nicole等吃晚餐，但第二天潘頓需要出賽，因此改為約早上遊船河，讓他可以多些時間排水，應付翌日賽事。」
講番馬仔，梁芷珊當初購入團體馬「點解」，原來全因為潘頓推薦。「潘頓對我表示曾騎過『點解』的父親，他指這兩駒的樣子極為相似，他指『點解』有潛力，我信任潘頓，於是二話不說在拍賣會買入此駒。」而潘頓果然冇老點梁芷珊，「點解」至今12戰已攞到4冠1亞5季，戰鬥力強勁，而且仲有唔少進步空間，好大機會殺到上一班。