有錢就是任性！發展商揼錢落示範單位裝修好正常，好似新地（016）咁，買高級名牌手袋、香水、相機，放喺示範單位度做陳列品，就真係比較少有，不過亦有少少土豪feel囉。
噚日新地開放旗下東涌新盤嘅示範單位，衣櫃同偏廳擺咗至少10個名牌手袋，全部真貨，包括Prada、CÉLINE，雖然只係普通款，但最平嗰個都過萬蚊。相機擺設由Rolleiflex古董雙鏡機到Leica數碼機都有。
最令女士受落，可能係廁所嘅玻璃香水架，佢用作分開淋浴間同馬桶位，每層擺三支Chanel N˚5經典版100毫升香水，總共擺咗30支。尖沙嘴專門店賣緊每支1,350蚊，全部香水價值超過4萬蚊。
呢堆名牌摸得，但現場有CCTV同金屬線鎖實，拎唔走。