邊幢大廈最早有自動扶手電梯？答案是中環萬宜大廈；全港有2萬幢30年樓齡以上嘅舊樓，單是中西區就佔一成；置地廣場百幾年前係臨海嘅香港大酒店，後來填海，再拆多幢建築物而成。八方變身「中區達人」，都係多得測量師帶路。香港測量師學會首次推出「測量師帶你行街GUIDE」公眾導賞團，遊走中環街市、嘉咸街市集、雲咸街等地細看歷史建築，仲會講解被忽略用作量度建築物位置嘅地界石。
測量師學會會長何鉅業希望導賞團吸引多啲年輕人認識香港，了解舊建築復修、重建限制等議題，思考吓生活空間、社區設施和用地規劃等。導賞團分別於9月13日、19日及10月3日、11日舉行，共8團，全程約1.5小時，可於學會網站報名或致電2526 3679查詢。