講起UFO，好自然就諗起夏韶聲，事關佢喺呢方面好有研究，仲話見過四次UFO。講近啲，TVB前記者吳曉東嘅細佬，前年亦喺青衣屋企影到一隻飛碟形物體，連夏韶聲都話90%可信。不過，原來除咗夏韶聲同UFO有淵源，林敏驄嘅音樂人家姐林敏怡都一樣！
嚇到彈起
家住元朗嘅林敏怡向來都有影天空嘅習慣，噚日佢畀咗一張前日黃昏6點幾，喺屋企陽台影天空嘅相馮仁昭睇，相入面除咗有藍天同白雲，仲分別有1大、1中同3小嘅白色物體夾雜喺雲層入面，相片中右下角嘅白色物體仲特別大同明顯，仔細睇仲會見到圓形物體有條黑邊，中間就有幾個黑點。
敏怡話：「古靈精怪嘢我見得好多，但係影得咁清楚係第一次。」佢又講笑咁講：「之前有啲唔係咁大場面，要用圈圈住先睇到，但今次就唔使圈，真係盲嘅都睇到，我影嗰時都冇留意，影完先至見到，我都即刻嚇到彈起。」問佢呢個情況維持咗幾耐？敏怡就話佢冇留意：「當時好熱好熱，我影完即刻走番入屋，其實我日日都會影天，但前日就好似有第六感咁，所以嗰時走出去影。」
撰文：馮仁昭
