【扮靚籽：美容絮語】
近日外媒報道，英國王妃Kate Middleton都有跳鋼管舞健身，姊妹們旋即組團學藝，減肥之餘更要學做惹火尤物，以舞功迷死港男。就咁睇以為轉兩圈好易？舞齡十年的Coral展示腳上瘀痕高呼：「跳鋼管舞好痛，少啲決心都唔得！」跳鋼管舞能減肥亦屬誤會，只會如游水般越練越壯碩，更要承受Coral口中「頭倒轉跌落地就冇命」的風險。性感舞衣與美妝背後，鋼管舞者皆有一本血淚史。
本身是專業化妝師的Coral，三年前創辦了自己的化妝室，其後更展開了跳鋼管舞這新興趣，在觀塘工廈Makeup studio裝私家鋼管跳舞，卻嚇到媽咪擔驚受怕，「工廈位置僻靜，阿媽都驚我失手暈咗冇人知，就落order練舞時要有朋友在場。」易受傷之說非虛，Coral亦有受傷經驗：「跳咗現代舞8年，年幾前見鋼管舞好sexy，攬住碌柱扭幾吓好似好易咪試吓。有次心急未搵到重心，單手硬撐全身，即時拉傷左邊背肌，要休息幾個月。學識唔係凡事打天才波就得，要有耐心慢慢練。」
越跳越似筋肉女
至於用以減肥，Coral就不建議，「鋼管舞講求以肌肉力量支撐全身，筋要夠鬆、柔韌度高，動作先順滑。我練瑜伽、體操來訓練肌肉強度，但流汗後脂肪比率減少，肌肉線條更明顯，越練越壯碩。」問她怕不怕變筋肉人，「好驚啊！自己都諗點解有咁多類型嘅舞唔跳，係要攞苦嚟辛。但對鋼管舞有情意結，無論承受幾多痛楚都會繼續跳！」
Dress code是性感少布
鋼管舞者大多着得性感少布，Coral卻指如游水着泳衣有實際需要，「跳舞時要靠皮膚與鋼管產生磨擦力，以鞏固於鋼管上。我多數着sports bra，出汗後快乾，彈性夠又不妨礙伸展，胸部要有pad防露點。外國品牌如Michi、Lululemon和Free People最stylish，背部有交叉編織設計，襯露背衫出街都靚。至於褲仔就怕醜唔揀T-back，揀排汗功能好嘅三角泳褲，踢腿時亦唔易走光。」鋼管舞係專業表演，必須化妝，Coral亦有心得：「我用防油防汗粉餅，上妝定妝一次過。畫眉和上胭脂能令人望落精神，膏狀如眉gel、霜狀如cream blush最持久。一頭順滑長髮亦是表演一部份，先用鹽水加厚volume，再用hair milk令髮絲順滑，就唔會有中途打結嘅尷尬情況！」
多功能sports bra 襯衫都型
好動女生 Keep住靚樣
（a）COS 銅鑼灣京士頓街2至4號地下
（b）Michi http://www.shopbop.com/
（c）Lululemon 中環IFC一樓1098B號舖
（d）Giorgio Armani beauty 中環遮打大廈109號舖
（e）10/10 space 尖沙嘴彌敦道Sogo專櫃
（f）萬寧 銅鑼灣禮頓道33至35號地舖
記者：楊麗珊
攝影：林栢鈞
編輯：李寶筠
美術：吳子豪