國企改革喺港股大時代前、中、後都炒得火熱，係目前唯一概念可以經得起股災考驗，因當中涉及國有資產重組同埋資產證券化，中金估計，呢啲資產可能多達100萬億銀，所以只係傳吓，投資者就可以憧憬無限，股價自然升途無限。
不過，國企改革其實仲有一個重點，就係國企管理架構！最近大陸就傳緊一個國企改革終極版──國企改革頂層設計方案，所謂頂層設計方案，即係管理架構，以前一向由國資委持有，監管同管理，佢個權係由國務院授權。
今次改革方案，有傳將國企以功能劃分，同時將國有資產管理由兩級改為三級，國資委同國企之間，加多個國有資本投資公司，令到國資委變成純粹監管嘅角色。換言之，為國企引入專業管理人員，改善過去高管即係高官嘅情況。
若設立國有資本投資公司，控制旗下央企或國企，或可令國資委專心監管，但若國有資本投資公司仍然有高官控制的話，結果只會是多了一層架構，並無改善角色重叠問題。雖然最終方案尚未出台，但以噚日傳出工信局副局長將出掌中移動（941）去推論，似乎「官管分家」機會不大。
流氓