話說KFC今日有新包出，雙層雞扒軍艦Double Down，一聽見個名已經好吸引，話晒佢係個用兩塊家鄉雞扒扮麵包嘅包，又有煙肉、芝士同沙律醬，邪惡到不得了，好想即刻試！
不過嚟到將軍澳分店，店員話個「包」嘅包面，即係雞扒賣晒冇貨，惟有撲過第二間啦。再嚟到銅鑼灣分店，個新餐唔算多人叫，都冇乜特大poster宣傳，價錢都係比其他「包包餐」貴約兩蚊。
一打開包裝紙，包中間嘅半溶芝士已經流緊出嚟，但塊煙肉就肥咗啲，似冇乜煎過咁。起初仲驚個「冇包」包會好dry，但食落完全唔覺，塊雞扒都幾juicy同嫩滑，夾埋芝士同煙肉，口感唔錯，不過略嫌鹹咗啲，食幾啖要飲返啖汽水沖一沖。食到大半已經有啲飽同膩，加埋個餐係搭特濃芝士醬嘅墨西哥脆脆，一個女人仔食絕對係超級heavy，不過最多食完跑多兩個圈囉，使怕你！
記者、攝影：黃依情