雖然好多政圈中人仲放緊暑假，但係商務及經濟發展局局長蘇錦樑（Greg）可謂相當「繁忙」，好似Uber事件、免費電視發牌之外，連美食車都關佢事。佢噚日同傳媒茶敍，就梗係畀八方同行家搶住問佢，但蘇局長忽然太極高手上身，將啲問題耍走晒。
噚日蘇局長被問到有關電召車Uber，何解政府一手引入Uber，另一手卻拘捕司機呢？投資推廣署係咪甩轆？或者冇同Uber事先講清楚香港法例係點寫？蘇局長一概唔正面回應，只係背番早前嘅新聞稿內容出嚟，話外國企業來港做生意大前提係守法，投資推廣署已向各企業提供不同資訊，至於法例係咪要修改，佢就話要「因應情況」，又話修例唔係佢嘅範疇。
講一帶一路就醒神
至於美食車問題，好似日後檔主賣緊薄餅、熱狗，警方會唔會喬裝食客話要拘捕廚師喺馬路上明火煮食？蘇局長照舊耍太極，話稍後會去立法會公佈詳情，之後不斷分享外國做法係點、外國美食車點好食，總之香港諗住點做、法例要點改，一概冇內容。甚至連點處理邱達昌申請免費電視牌照，蘇局長都繼續四両撥千斤，話會「按既定程序、公平公正、程序公義」咁去處理！至於王維基嘅港視就更加唔使理啦！
不過，蘇局長又唔係一味耍太極，一講到一帶一路嘅偉大構想，局長就醒神，話要向其他地方推廣香港作為國家「超級聯繫人」嘅角色云云，講咁耐，原來蘇局長只係想話畀「一男子」知道，佢已經交咗功課喇。
李八方
mailto:[email protected]