因向財爺曾俊華掟雞蛋坐監嘅社民連秘書長陳德章（圖），早兩日先入稟申請司法覆核，話懲教署唔畀黃種人食西餐，又唔明點解黃皮膚同西方人食飯時要分開坐，而黑人同白人就食大大份嘅漢堡包同炸雞翼，但黃種人就只有豆粥同有骨魚，噚日佢又再申請司法覆核，今次挑戰懲教署限制犯人書本數目。
署方：唔夠位擺
陳德章話佢喺監獄要寫兩篇碩士論文，但係懲教署規定每個月只可以畀佢接收最多6本非宗教書籍入監房。
陳德章認為呢個規定，唔單止阻礙佢進行學術研究，仲違反咗《基本法》同埋《經濟、社會及文化權利國際公約》，而佢喺入稟狀度仲話，有關宗教嘅書本就冇數量上限，所以陳德章覺得懲教署署長有咁嘅規定係好唔公平。
懲教署就發聲明，話鼓勵在囚人士進修，限制書本數目，係基於保安理由同存放空間問題。