爆完一單又一單！講嘅唔係股市，而係真正嘅爆炸。繼6月27日台灣粉塵爆炸後，上周三天津危險品倉庫發生大爆炸，本周一泰國曼谷四面佛旁又發生爆炸。願死者安息，傷者平安。
爆炸，唔係天災，係人禍！天津大爆炸，頭七剛過，血仍未乾，留下一大堆問號。外界一直質疑點解涉事危險品倉庫咁近民居？點解可無證營運？點解安評、環評可過關？當局有冇違規審批？點解天津市管唔到天津港？究竟哪些危險品爆炸肇事？700噸山埃處置好未？空氣、海水係咪受到污染？點樣防止悲劇重演？一定要徹查追責！
天津大爆炸影響三大國策：一帶一路、自貿港、京津冀規劃。多隻天津概念股連日捱沽，包括天津港（3382）、持有天津港21%的天津發展（882）等。離爆炸中心400米係進口車停車場，有近萬輛進口車被毀，汽車股亦被波及。由於事故涉及保險索償，內險股也受拖累，財險（2328）最大鑊。
業績期已過了大半，企業的成績表未見驚嚇，反而人民幣被阿爺暴力貶值，三日累貶4.7%，就嚇到投資者腳軟。雖然炒人民幣係超級大戶的遊戲，但突然貶值，連做人民幣定期存款的市民都嚇親。人行連日吹風，拍心口話匯價已到位，人心才稍定。
前日央行逆回購大放水過千億元，昨日又加碼MLF過千億元，但市場仍乏信心。A股前日暴跌6.15%後，昨日先跌5%再拗腰倒升1.23%，收報3794。港股則由升轉跌，收報23167，跌307點或1.31%。A股明日期指結算，下周五輪到黑期結算，新加坡A50期指即月合約低水1.6%，未平倉合約近52萬張，小心。
維達績佳潛力大
股匯市場存暗湧，投資者宜沽出只具炒作概念的裸泳股，轉投防守股。日常生活中，無論股市升定跌，銀紙升值定貶值，市民都要幫襯的，就最具防守性。我近日就留意必需品和日用品股份，心水係維達（3331）。
維達係內地第三大家庭生活用紙品牌，自去年獲控股股東Tempo母公司愛生雅（SCA）注資後，取得多個全球暢銷的紙巾、衞生巾、嬰兒和成人紙尿褲品牌，包括Tempo、噓噓樂、添寧等，業績有望躍進。維達中期多賺49%，好過市場預期。集團又積極開拓電商分銷，現時電商生意佔9.8%，打算五年內提升至兩成，成未來增長引擎。
隨着人口老化及一孩政策放寬，老人及兒童護理產品需求趨增；內地人均生活用紙僅4.7公斤，遠低於香港和美國的10公斤及21.9公斤，市場潛力大。
維達股災後強勢破頂，高見19.72元後獲利回吐盤湧現，近日仍在整固，未見反彈訊號，惟跌至保歷加通道底線後沽壓漸減，可候17元樓下吸納，中長線睇20.6元。
割柑人
本欄逢周四刊出