曼聯今個夏天簽入咗幾個新球員，聯賽踢咗兩場，邊個嘅表現最好，對球隊嘅幫助最立竿見影呢？小弟覺得法國防中舒尼達連（圖）已經成為曼聯中場嘅穩膽，舒韋恩史迪加、卡域克、安達靴里拉都取代唔到佢嘅工作，上一個好似舒尼達連咁搶得嘅曼聯防中，真係要數到夏格維斯嘞。
防中問題真係困擾咗曼聯好多年，自從堅尼走咗之後，曼聯都好想搵一個搶得嘅防中，可惜艾辛就俾車路士搶咗，而卡域克就唔同類型，意識係好好，但講到同對手埋牙鬥搶，就真係麻麻地。直至夏格維斯嚟到，唔少曼聯球迷都開心，話卡域克終於搵到個好拍檔，點知原來夏格係個玻璃人。夏格之後，曼聯叫做最搶得嘅防中叫費查，防守技術一般，但勝在拼勁十足，擁有跑不完嘅氣力，可惜勁過一兩季之後怪病纏身。之後曼聯買過費蘭尼，但用吓用吓先知佢踢攻中好啲，上季終於買咗個正宗防中戴利白蘭特，佢係好勤力，但身材唔多掂。
今夏曼聯閃簽舒尼達連，真係轉會市場嘅一筆佳作！呢兩場聯賽有佢喺度，中場防守好穩陣，場均成功搶截4.5次，攔截就四次。上場對維拉，有次係衝到去人哋底線度搶波，原本對手後衞都攞晒身位，等個波出底線，但舒尼達連都可以搶番個波返嚟。除咗運動戰中做一個搶波機器，佢喺曼聯嘅死球戰術中都好重要。每逢有罰球，舒尼達連通常都企喺遠柱，係重要嘅接應點，例如季前賽前對CF阿美利加嘅入球，對維拉都有次接應迪比罰球頂斜。
文：咖喱