英國早幾年有個調查指出，人的一生，約有半年的光陰用作排隊，例如排隊上廁所、排隊付鈔、排隊等食飯等等。不過，近年來香港人用於排隊的時間可能多了一樣，就是排隊買樓，仲要一排隨時排足一個朝早，早餐都無時間食。
日前房協長沙灣「喜」字系最後兩期喜薈同喜漾「大晒冷」，兩次賣樓都是星期六早上「晨咁早」8:45開始登記，雖然發展商一如以往於酒樓包場賣樓，聽落有得食又有冷氣涼，應該都幾爽，之不過，由於要按抽籤次序入場，賣喜漾當日即使是史上最熱的立秋，未到籌的買家一樣要企街排隊，現場更有職員不時大喊，限制每一組客戶連同代理不可以多過四個人入場揀樓，不過仍然無阻買家對房協新盤的熱情，全盤275伙，12個小時內沽清。
事實上，今時今日的香港地，貧富已經懸殊到由赤道去北極，一條街住滿一大堆劏房蟻民之際，另一條街和你擦身而過的，好可能是一個又一個百萬富翁，甚至是千萬富翁。更甚的是，早年買落的小業主好多都已經供滿樓，早已經脫離「樓奴」生涯，今日去買樓的一群，問十個可能隨時有三幾個可以Full pay，按揭都可以「慳番」，但發展商「話知你」是百萬富翁抑或千萬富翁，一樣無情講，齊齊都要排，不論睇樓買樓都要「排餐死」，除非買大手。難怪早排有代理吹水講了一句「唔使做樓奴，都要為樓勞」，是勞役個勞。
不過，有規有矩有秩序，就係香港人可貴的精神。
記者：黃嘉銘