自從基斯坦奴朗拿度（C朗）喺2009年離開曼聯之後，曼聯件7號波衫一直冇一個合適嘅新主人，不過喺前晚，今夏加盟嘅迪比，就證明咗佢襯得起呢件7號波衫。呢位荷蘭超新星入兩球兼交出一次靚助攻，帶領曼聯喺歐聯附加賽首回合以3:1反勝來訪嘅布魯日。曼聯家陣半隻腳入咗分組賽，有望帶嚟5,000萬鎊收入（約6億港元），唔怪得領隊雲高爾賽後話想錫啖迪比啦。
雲高爾：想錫啖迪比
曼聯前晚以強陣迎戰布魯日，但踢咗八分鐘就嚇到粉絲心都離埋，皆因卡域克擺烏龍令佢哋落後0:1。不過，卡域克喺五分鐘後將功補過，妙傳畀迪比，迪比展示個人技術，闖入禁區再射入，幫球隊追成1:1，兼攞到加盟曼聯後首個入波。去到43分鐘，迪比禁區外射入靚波，幫曼聯反超前2:1兼保住「半勝」。換邊後迪比有機會上演帽子戲法，但佢接應朗尼後踭妙傳之後竟然炒高。但係去到補時四分鐘佢為隊友鋪橋搭路，助攻畀費蘭尼頂成3:1完場，[-1]「主勝」順利開出。
助曼聯3:1反勝布魯日
曼聯首回合領先3:1，下周三作客比利時只要唔失準，應該可以殺入分組賽。雲高爾賽後話：「迪比今晚入咗兩球同一次助攻，我想錫佢一啖。」至於迪比就話：「我好開心可以入波兼幫球隊贏波。我哋有好多機會，但我必須承認自己有啲失望，係我應該可以連中三元。」迪比前晚對波砵仲好特別，鞋帶上印有「入我歐聯第一球」，最終真係完成任務。
自從C朗轉投皇馬之後，奧雲、路爾斯華倫西亞同迪馬利亞都着過曼聯件7號波衫，但就冇個掂；家陣迪比一手幫曼聯反敗為勝，令人相信呢位喺今夏由燕豪芬以3,100萬鎊加盟嘅21歲荷蘭超新星，孭得起紅魔呢件7號波衫。迪比只係用咗163分鐘就攞到喺曼聯嘅第一球，比C朗快三倍（見附表）。
