商務及經濟發展局局長蘇錦樑（阿Greg）啱啱外訪返港，噚日已經喺天文台台長岑智明陪同下參觀香港天文台總部。打風落雨關阿Greg乜事，點解連天文台都要管？查實天文台係隸屬商務及經濟發展局㗎，佢並非厚多士。
阿Greg喺fb話參觀期間唔單止同預報員交談，亦踩入錄影室，參觀該台新添置嘅「天氣圖像製作系統」，甚至粉墨登場，戴上黑超參與公眾氣象教育節目「氣象冷知識」嘅製作，喺新一輯節目「香港好地方」，會同天文台電視天氣主播一齊介紹香港旅遊天氣提示㖭。
咦，天文台兩個天氣雷達早前喺暴雨下壞機，其中位於大老山嘅多普勒天氣雷達仲壞足16粒鐘，唔知阿Greg有冇就此問責呢？