每次聽立法會主席、民建聯嘅曾鈺成發表高見，八方都覺得好funny兼學到嘢。噚日之嘛，有線電視播出曾鈺成嘅第二波專訪，最令人印象深刻，莫過於曾主席笑稱，早前佢話「如果後生10年會選特首」嘅策略，好有效呀，點解呢？因為最近少咗人攻擊佢喎，係咪由當初講呢句sound bite，到事後評價自己嘅言論，都好有智慧呢，事關佢冇講過係邊啲人攻擊佢，但唔知點解個個都有嫌疑犯「心水」。
細佬忙去飯局
曾主席話好多攻擊都係源自有啲人怕佢參選，最近已經回復平靜。而曾踢爆細佬曾德成唔係主動辭職嘅曾主席，透露細佬離職後冇不快，反比做局長時更忙，因好多人搵佢傾偈食飯，但佢唔願再講政府到底係咪有人做蠢事。