因為男友彭懷安（Eddie）偷食而將感情降溫嘅朱慧敏，劇情發展認真峯迴路轉，一時話女方要出走冷靜，點知轉頭男方受傷，女方拿拿臨又走去醫院探病，但係嗰陣都係強調大家只係生意拍檔，點知轉個頭又預告中秋人月兩團圓。不過團圓就唔使等到中秋咁耐。
短褲look出現
前晚喺西環嘅華星客棧，Eddie同朱慧敏就夫唱婦隨咁喺度睇舖，最初係Eddie一個人喺度打點，差唔多8點鐘，老闆娘朱慧敏短褲look咁出現，佢哋兩個輪流咁招呼啲熟客，冇耐仲見到大台同事，佢兩個分別都有行埋去傾幾句，睇見佢哋行出行入真係好忙。
隔咗一陣仲見到李逸朗同新城DJ杜浚斌，仲有其他朋友去開餐，Eddie同朱慧敏兩個索性坐埋一齊吹水，傾傾吓仲出咗去食煙，其間見到朱慧敏拎住電話行出嚟，講咗一大輪嘢，Eddie俾番個眼色，朱慧敏好滿意咁行返入舖。馮仁昭成晚睇到男方負責打點，女方負責奉客，老夫老妻咁有晒默契，如果唔係有偷食風波，真係冇人信佢哋感情有問題。
撰文：馮仁昭
