衞冕嘅車路士，喺上場英超聯賽大大鑊輸咗俾曼城0:3之後，摩連奴換走泰利似係宣示不滿，球會果然即刻做嘢，喺星期三就成功截劫咗曼聯，以2,110萬鎊（約2.5億港元）羅致咗巴塞隆拿嘅西班牙翼鋒柏度洛迪古斯，傾掂埋個人條件就可以落實。據講，28歲嘅柏度係覺得曼聯講咗咁耐都仲未行動，唔夠誠意。
不過，根據路邊社消息就話，柏度唔加盟紅魔鬼，好可能係同紅魔領隊雲高爾唔妥嘅門將域陀華迪斯（VV）落重藥有關喎！不過，曼聯就唔承認係俾車仔截劫，唔知喺邊度走出個知情人士話，曼聯其實係衡量過一切之後，決定喺周二晚唔再斟柏度洛迪古斯喎！而曼聯方面，亦唔打算再喺今夏簽新兵。