華華之前提過福建西裝股虎都（2399）更換行政總裁（CEO），由年僅25歲嘅太子爺郭漢鋒，接替爸爸郭建新，管理呢間18億市值嘅上市公司。正當眾多女士以為又多一個「城中筍盤」之際，原來呢位年輕CEO已經成家立室，仲有兩個仔！
郭漢鋒噚日同華華講，佢已經結咗婚，仲有兩個仔，分別兩歲同一歲。佢解釋話，作為福建人，早婚非常普遍；而且傳統習俗上，女家要向男家畀禮金，雖然郭家家底都有番咁上下，但都要象徵式收番少少聘禮。
升做行政總裁後，虎都日常運作基本上繼續由郭漢鋒打理，若有重大決定，佢就會跟主席，即係爸爸郭建新商量。其實郭漢鋒入咗公司兩年，已經好熟書，上至衣物布料，下至洗衫用嘅洗潔劑都講得頭頭是道，亦好謙遜，睇嚟郭主席可以放心交棒。