早前港大校委會開會期間，聲稱被撞跌嘅港大教授「鐵醫」盧寵茂，最近竟然成為「股壇長毛」David Webb（圖）狙擊目標。
老牌家電工業股亞倫國際（684）噚日召開周年股東會，今次亞倫國際所有決議案都獲得通過，但有15.79%小股東卻反對重選鐵醫為獨立非執董，其中一個係David Webb。
Webb持有11.04%亞倫國際股權，佢噚日主動披露投咗反對票，指鐵醫作為獨董，卻缺席股東會，又冇為公司做過乜，所以想踢佢出董事會，仲潤多句「喺香港，獨董只係為控股股東服務」。
股東會狙擊失敗
但係結果由於仲有84.21%股東投咗贊成票，所以股壇長毛呢次狙擊行動失敗。
根據年報資料，任獨立非執董嘅鐵醫連續10年放棄10萬蚊董事袍金，全數出席去年4次董事會會議，但因為「有其他公務」而冇出席AGM。