阿里巴巴上季收入不似預期，拖累股價下跌，唔知係咪想搵人救亡，老闆馬雲最新委任雀巢集團（Nestle）主管亞洲、大洋洲與非洲市場業務嘅執行副總裁龔萬仁（Wan Ling Martello），成為獨立董事，令到公司董事會人數增加到11人。
阿里董事會雖然猛人眾多，由雅虎創辦人楊致遠，到前特首董建華、奧運划艇冠軍兼前高盛副總裁J. Michael Evans等，但原來大部份董事只係有財務與IT專長，對商貿行業涉獵甚少，今次請龔萬仁入局，睇落就順理成章。
龔萬仁先後做過沃爾瑪與雀巢嘅首席財務官，亦管理過沃爾瑪電子商貿業務，馬雲都話佢具國際視野與零售業專長，於是邀請對方入局，成為阿里董事會一分子。
之但係，馬雲5月委任張勇成為首席執行官又講過，「現在是年輕人的時代」，龔萬仁有30年工作經驗，唔通都係要有年資有番咁上下嘅人把關？