今年是陳法拉入行的第十年，選美出身，由節目主持做起，一年後踩入戲劇組，憑惹火小三、催淚啞女、反叛機師等角色，走上花旦地位。兩年前決定脫離密集式拍劇、曝光的電視台生活，但絕不代表放慢手腳，鏡頭後依然進取，闖內地拍戲，赴美國讀演藝課程，爭取時間陪家人，進擊位在於追回昔日錯失的時光。愛情？卻懶得去追，當學生的她拋下學院派口吻，「撻得着嗰吓冇任何數據解釋，真係靠緣份。」
統籌：林妙萍
造型、撰文：林嘉慈
攝影：郭賢興
化妝：Mon Cheng of Annie G Chan
髮型：Alex So of The Attic
陳法拉離開通告接通告、日夜顛倒的非人生活兩年，現在穿梭中港拍戲、拍廣告、做騷，有空檔就跑到美國做演藝學生、陪家人，享受全權掌控生活節奏，「一切都變得單純啲，顧慮少咗，唔會擔心下面發生乜事。」充裕時間容許慢慢體會身邊一事一物，滿足感更大，「以前真係忙到呢，所有嘢都喺眼邊就咁過咗就算。」
新生活充滿彈性，自然可以叉足電迎接每個工作，受訪當日，她剛剛結束與父母同遊美國大峽谷、黃石國家公園、科羅拉多州雪山的兩星期旅程，「喺海拔一萬呎之上嘅地方攀，每攀一mile，高度升一千呎，基本上係直線向上攀，幾喘氣，同埋可能因為離太陽近一萬呎，曬到皮膚好痛。」的確，顧慮少了，豁出去任曬，「要keep住抓石頭，又要keep平衡，冇得好娘咁擔遮。」
發掘搞笑細胞
法拉不斷求新，學演戲去了解自己，今年完成莎士比亞舞台劇，燃起這方面的熱情，想自編自演坎坷角色，「悲劇對我有種吸引力，希望有個好強嘅女性角色，女性個種忍耐力、柔韌、毅力，男人係做唔到，寫港版《阿信的故事》都好，哈哈！」
實踐個人創作前，先挑戰悲劇另一極：笑片，「一路拒絕相信有搞笑細胞，覺得自己唔好笑。」但在鄭中基與陳嘉上聯手執導、穿越時空的新片《神秘寶藏》中，分飾在長洲長大的鄰家女孩，及黃子華所飾張保仔的老婆、清朝著名女海盜鄭一嫂，從黑皮膚、面有刀疤、黃牙的醜女形象着手搞笑。沒有鄭中基的無厘頭爆粗，沒有黃子華的高轉數笑料，法拉是「認真地」搞笑，「開會嘅時候我好認真咁做晒功課，我話佢哋長年累月冇得返岸，因為清朝政府追緊佢哋，長年喺海上生活，冇菜食，又冇淡水，淨係食魚，食啲乾糧，好辛苦，即係冇得去廁所喎。」一個生理課題，引得全場大笑，讓她演上癮，「可以攞正牌做天馬行空嘅事，培養想像力。」
等待規矩男人
在新片愛上海盜，法拉卻不信男人不壞，女人不愛，「我壞過佢哋喎，其實女人壞，可能男人都鍾意，唔知呢，可能曳曳地，有啲反叛，有啲挑戰性，太乖、太靜態，男人未必覺得千依百順就係好，可能掉轉講，女人不壞，男人不愛呢。」現實中，她拒愛壞男人，「其實我鍾意規規矩矩、好人，有安全感啲。」
舊愛Neway太子爺薛世恆有新緋聞女友梁雨恩，法拉則等待新戀情，「唔到我追求。」父母沒有催逼她積極求愛，「佢哋好open，冇乜所謂，中國人父母好少談論：你感情點呀？佢哋比較少提及呢個話題，畀啲空間我。」現階段所接觸的都是同學與圈中人，堅信刻意找男友，未必找到適合，「人同人之間嘅接觸點，撻得着嗰吓係冇任何數據或方法解釋到，所以真係靠緣份。」
【愛 自然】
生活回歸樸實，連帶衣着打扮都愛好自然舒服。法拉在拍攝當日的清晨落機，稍為整理行裝就素顏到影樓，戴aviator黑超，穿T恤、長褲，揹運動型背囊，隨意得很。在預先準備好的十多套拍攝服裝中，法拉最愛啡色冷衫配駱駝色半截裙（圖），食正normcore熱，埋位不其然擺出咬衫袖、拉闊衫身的甫士，盡現carefree真我，「着得好舒服，好貼近日常會着嘅衫，影相時唔需要就住就住，可以隨意郁，笑得最開心。」
【拾 回憶】
法拉十年間試勻歌影視，演過不少令人深刻的角色。
2005 奪華姐亞軍入行
2007 《師奶兵團》誘人夫
2008 《溏心風暴之家好月圓》全手語扮慘情啞女
2010 《巾幗梟雄之義海豪情》演苦情難民，奪無綫頒獎禮「最佳女配角」
2013 《衝上雲霄II》反叛機師
2015 首部笑片《神秘寶藏》
更多精采時尚內容，盡在 http://add.appledaily.com 。